Суботні дзень 16.04.2022 па ініцыятыве бацькоў і пры падтрымцы настаўнікаў вырашана было прысвяціць сумеснаму з дзецьмі наведванню Мірскага замка, адной з найважнейшых каштоўнасцяў Беларусі. З самага ранку нашы юныя турысты разам з дарослымітрапілі да сцен гэтага славутага сведкі гісторыі, і нават не надта цёплае надвор’е не перашкодзіла ім агледзець ваколіцы замка.Уражаныя велічнасцю збудаванняў і захопленыя легендамі пра іх, якія нагадала дзецям настаўнік гісторыі, дзеці з нецярплівасцю накіраваліся ў вестыбюль замка, дзе іх ужо чакаў экскурсавод.
Падчас экскурсііюнакі і дзяўчаты атрымалі магчымасць агледзець увесь замак, пачынаючы з падвальных памяшканняў і заканчваючы абарончымі вежамі, куды нават не ўсе дарослыя змаглі падняцца з-за высокіх і нязручных прыступак каменных лабірынтаў. Але ці магло гэта спыніць нашых маленькіх даследчыкаў?!
Перш чым распавесці юным наведвальнікам пра гісторыю Мірскага замка экскурсавод засяродзіла іх ўвагу на тым, што гэта не адзінае такое збудаванне.У асобным памяшканні замка былі размешчаны выдатна зробленыя, паменшаныя ў дзесяткі разоў копіі ўсіх старадаўніх замкаў Беларусі, якія адыгралі значную ролю ў гісторыі краіны. Каля гэтых макетаў дзеці затрымаліся надоўга – пэўна, планавалі наступныя паездкі!
Наступныя экспазіцыі былі прысвечаны ўладальнікам Мірскага замка. Акрамя падрабязнага аповеду пра гэтых неардынарных людзей, кожны з якіх уносіў у знешні выгляд замка нешта сваё, экскурсавод звярнула ўвагу рабят на тое, што гэты волатшматперажыў: Паўночную вайну, падзел Рэчы Паспалітай, нашэсце Напалеона. Не абмінулі яго падзеі Першай сусветнай і Вялікай Айчыннай вайны.Экспанаты музейных выстаў дазволілі дзецям быццам бы перанесціся ў часе і на свае вочы пабачыць як слаўныя, так і горкія старонкі жыцця яго насельнікаў:будаўніцтва замка Ільінічамі, паляванне на тураў, шыкоўныя балы і прыёмы Радзівілаў, пакуты яўрэяў і савецкіх ваенапалонных, гаротнае існаванне мясцовага насельніцтва ў пасляваенны час. Напрыканцы гэтага змястоўнага аповеду дзеці загадалі свае самыя запаветныя жаданні, дакрануўшыся да фрагмента сцяны, якая была збудавана ў самым пачатку ўзвядзення Мірскага замка.
Пасля завяршэння экскурсіі нашы юныя турысты, іх бацькі і настаўнікі размеркаваліся на дзве групы для ўдзелу ў музейных занятках. Дзеці і дарослыя з першай групы, аглядаючы рэканструяваныя кухонныя памяшканні замка, даследвалі рэцэпт “святочнай стравы” для князя, выконваючы пры гэтым розныя практычныя заданні: здрабнялі ў ступцы спецыі, успамінаючы іх пах і смак,вымяралі неабходную колькасць прадуктаў згодна з рэцэптам.
Другая група была занята каардынальна іншай справай: іх увага была засяроджана на асаблівасцях арганізацыі войска і вайсковай справыў XVI ст.Яны даведалісяпра склад паспалітага рушэння – войска Вялікага Княства Літоўскага. Музейны супрацоўнік не толькі пазнаёміў дзяцей з рознымі відамі ахоўнага ўзбраення, але і навучыўапранаць даспехі, трымаць меч і шчыт.
У рэшце рэшт наша маленькае падарожжа падышло да свайго лагічнага завяршэння. Напоўненыя незабыўнымі ўражаннямі, дзеці разважалі, куды яшчэ можна здзейсніць падобную паездку. Бацькі і настаўнікі ўсміхаліся і згаджаліся са сваімі непаседамі, бо час ад часу трэба адкласці ўсе справы дзеля такой добрай справы як выхаванне сапраўдных грамадзян Беларусі, што будуць ганарыцца сваёй гісторыяй і яе слаўнымі набыткамі.
